duskant sutherland

Van julle sal hierdie inskrywing wat ek in Februarie vanjaar gemaak het, onthou:

6 Maande het verloop waarna die volgende reaksie, geskryf deur ‘n ene “8 NOVEMBER 1987″, die afgelope week op hierdie inskrywing verskyn het:

“…EK ONTHOU DIE DAG TOE EK DIE ADVERTENSIE BY TUKS OPGESIT HET!

DOEN EK DIE REGTE DING…? WAT IS DIE KANS…?, SAL SY DIT SIEN?, SAL SY REAGEER?, SE NOU MAAR…!, WAT SAL EK DOEN AS…?, EK KAN DIT NIE ALLEEN DOEN NIE…!, WEES STIL MY HART!, AS DIE HERE WIL DAN SAL DIT SO WEES.

EK HET VIR MEER AS ‘N JAAR DAAROOR GEDINK EN GEBID NADAT EK ‘N BRIEF, VIA DIE MAATSKAPLIKE WERKSTER, PROBEER STUUR HET. DAARIN EK MY HART TEENOOR HAAR MA OOPGEMAAK. HAAR MA HET BLOOT NET GEWYER OM DIE BRIEF IN ONTVANGS TE NEEM. WAAROM? KAN ‘N MENS SO GEVOELLOOS WEES TEENOOR IEMAND WAT SO ‘N KOSBAARSTE GESKENK VIR JOU GEGEE HET. WETENDE WAT DIT HAAR GEKOS HET EN HOE JY SAL VOEL AS JY HAAR OOIT MOET VERLOOR. EK IS AL AMPER 22 JAAR STUKKEND OOR MY DOGTER! (MY ONGEHUDE SWANGERSKAP WAS TRAUMATIES VIR MY.) EK WIL EN KAN HAAR TOG NIE TERUGNEEM EN HAAR SELF GROOTMAAK NIE. 18 IS NOU MONDIG. SY IS NOU 20 EN KLAAR ‘N GROOTMENS. EK KAN OP DIE MEESTE VIR HAAR ‘N OUER VRIENDIN WEES.

EK HET BESLUIT OM ‘N KANS TE VAT BY TUKS, WANT SY IS HIER GEBORE. EK HET DIE KENNISGEWING KLEIN GEMAAK EN NET DIE NODIGSTE DAAROP GESKRYF, WANT EK WOU HAAR NIE BLOOTSTEL NIE. OOK HET EK GEREDENEER DAT DIT HAAR DIE GELEENTHEID SOU GEE OM DIE BESLUIT TE MAAK OF SY DAAROP WIL REAGEER AL DAN NIE. (EK VERMOED DAT HAAR MA HAAR DALK NIE HIERIN ONDERSTEUN NIE.) DAAR WAS DUS GEEN DRUK OP HAAR NIE. SY KON DOEN SOOS HAAR HART HAAR LEI. SY KON MY NR. SKAKEL OF NIE. (BAIE DANKIE AAN DIE PERSOON WAT DIE FOTO GEPLAAS HET DAT JY MY NR. VERSTEEK HET. DIT WAS BAIE BEDAGSAAM

MAG EK NOOIT GEMOEDSRUS OOR DIE BESLUIT WAARVAN EK (AS ‘N NET-NET 17 JARIGE VERWARDE TIENER) NOOIT DIE IMPLIKASIES KON VOORSIEN OF BEDINK HET, KRY NIE? EK HET GEDINK OM HAAR TE LAAT AANNEEM IS DIE BESTE VIR HAAR EN VIR ALMAL ANDERS WAT DAARDEUR GERAAK WORD.

BAIE DANKIE AAN ALMAL WAT MY NIE VEROORDEEL HET NIE. “AAN DIE WAT GENADE BETOON, SAL GENADE BETOON WORD” OF “WAT ONS SAAI, SAL ONS MAAI”.

EK WAS EN IS VIR HAAR LIEF. SY IS BLOED VAN MY BLOED EN VLEES VAN MY VLEES, DEEL VAN MY. (EK KAN DIT NIE VERKLAAR NIE. MAAR AS KINDERLOSE OUERS KAN TREUR OOR DIE KINDERS WAT HULLE NIE HET NIE – MAG EK SEKER TREUR OOR DIE EEN WAT EK HET EN NIE MAG KEN NIE.) EK SAL HAAR NOOIT KAN VERGEET NIE. EK HET 3 ANDER KINDERS EN AS EK AAN HAAR DINK WEET EK, EK IS VIR HAAR NET SO LIEF SOOS VIR HULLE.

SY HET MY TOE NIE GEKONTAK NIE EK HET WEL REDE OM TE DINK DAT SY DIE KENNISGEWING GESIEN HET. EK NEEM HAAR NIE KWALIK NIE, WANT WANNEER SY REG IS SAL SY MY OPSOEK. EK BID EN VERLANG AL BAIE JARE NA HAAR EN SAL DIT DOEN TOT EK MY LAASTE ASEM UITBLAAS, AS DIT MOET. SOLANK SY GELUKKIG IS EN VREDE IN HAAR HART HET. DIS AL WAT TEL! EK SAL ALTYD HIER WEES VIR HAAR.

JY WONDER SEKER HOE EK OP HIERDIE “SITE” AFGEKOM HET? AL WAT EK KAN SE IS: DIS ‘N WORDERWERK!

DIE WOORD LEER ONS: “ALLES HET SY BEPAALDE UUR, EN VIR ELKE SAAKONDER DIE HEMEL IS DAAR ‘N TYD:” EK WAG OP HOM. AMEN!…”

Natuurlik is daar nie juis ‘n manier om vas te stel of hierdie woorde werklik deur die ouer van die kind ter sprake, geskryf is nie. Tog is dit ‘n interessante en hartroerende blik op die perspektief van die ongehude ouer.

Dink jy hierdie moeder  moet toegelaat word om kontak met haar aangenome kind te hê?