duskant sutherland

Ek dog nog ek steek die draak met die Els-gesin wat sak en pak oppad is Nieu-Seeland toe…toe bars die volgende bom…nodeloos om te sê, in die Stem van die Volk:

Robbie Klay ’n ‘seksspeelding’ 
Robbie Klay (21), jong hartebreker-sanger en akteur, was as kind sewe jaar lank die “seksspeelding” van een van die bekendste mans in die Suid-Afrikaanse vermaaklikheidswêreld. Klay, wat verskeie CD’s op die winkelrakke het en die rol van die skoolseun Buks in die TV-reekse Amalia en Amalia 2 vertolk het, het die naweek gesê hy wil eksklusief met Beeld oor sy “sekshel” praat om “ander kinders wat iets soortgelyks deurmaak, aan te moedig om dadelik daaroor te praat met iemand wat hulle kan vertrou”. Hy was tien jaar oud toe die seksdade begin het, wat “orale seks, masturbasie tot drie keer per dag, pornografie en naakvideo’s” van hom (Klay) ingesluit het. Klay verwys na die man as “die oom”…[  ]…”Ek moet eerlik wees – ek wens ek kan net, noudat ek volwasse is, één kans kry om die oom te bliksem. Ek sal sy nek breek…[  ]…Ek het nie geweet hoe om dit te stop nie. Ek het steeds stilgebly, want ek was bang. Ek was bang my musiekloopbaan ly daaronder, want die oom het baie mag in die vermaaklikheidsbedryf…”

Verskeie ingeligtes (en netsoveel oningeligtes) verbind onse blouoog-minnesanger direk met hierdie siek besigheid. Nouja, ek is eintlik nie eens lus om enigsins verder hieroor te gesels nie…mens moet seker wag tot hierdie rokie se vuurtjie brand (wat so teen môremiddag behoort te gebeur)…

Ek wil wel sommer vir Robbie self ietsie sê:
Ou maat, luister nou mooi en sekuur. Vat daardie twee gym-vuiste van jou en gaan bliksem die wit-waks uit die “oom” uit. Bliksem hom vir elke keer wat hy sy sif fantasieë op jou afgedwing het. Bliksem hom vir elke keer wat hy ‘n laaitie wat nog met karretjies moes speel gedwing het om met hom te speel. Bliksem hom dat hy weet hoe seer jy gekry het…Bliksem en bliksem hard…laat dit tel, wys hom dat dit nie weer sal gebeur nie. Nooit weer nie.

(Trek net eers surgical gloves aan…)

Ek lees vanmiddag die volgende berig in…wag daarvoor…jip, die Griffel van die Volk se Sondagsuster...

Sunette Bridges sê haar kêrel per e-pos af

Sunette Bridges se kêrel van die afgelope twee jaar, Tommy Lawson, sit op straat nadat die 37-jarige sangeres hul verhouding per e-pos beëindig het. Nadat sy die e-pos gestuur het, het Bridges beslag gelê op die bakkie wat haar gewese kêrel vir sake gebruik. Sy het ook Lawson se selfoonkontrak beëindig. Die paartjie se groot uitval was in Januarie, toe Lawson in Durban by die krieketwedstryd tussen die Proteas en die Windies opgetree het.

Dié twee het begin uitgaan nadat Bridges se vorige verloofde, Skip van Jaarsveld, haar ’n maand voor hul troue gelos het. Ironies genoeg het Van Jaarsveld, wat intussen verlede naweek getrou het, haar per SMS afgesê. Sy het hom sedertdien vir troubreuk gedagvaar. Die saak kom aanstaande maand voor die hof. Kort nadat Van Jaarsveld hul verlowing verbreek het, het sy en Lawson saam ingetrek.

“My hart is gebreek,” sê hy. “Ek kan nie glo dat sy dit aan my gedoen het nie. Sy het my daarvan beskuldig dat ek selfsugtig is, maar dit? Ek het haar kinders soos my eie grootgemaak.” Bridges het gister aan Rapport gesê: “Hy is ’n wonderlike, talentvolle mens en ek wens hom regtig sterkte toe.”

Herinner my netgou weer…in ‘n wêreld van seer en swaarkry…in ‘n Suid-Afrika waar korrupsie, rassisme en wantroue hoogty vier is Sunette Bridges voorblad-nuuswaardig…

HOE…!!!????!!!

JOOL.

Kies ek toe ouder-gewoonte gisteraand koers na die Universiteit van Pretoria se Joolplaas vir die jaarlikse makietie daar. Terwyl ek so tussen uitbundige studente parkeerplek soek maak ek sommer so bietjie somme in my kop. My 5de Jool.
Maskas…

Ek maak aanstaltes in die rigting van die geraas en kort voor lank, biertjie in die hand, luister ons na die polsende klanke van Tidal Waves. Onwillekeurig dink ek aan 2003 toe hulle ook by die Joolkonsert gespeel het. En by 2004 by Oppikoppi. En Tings ‘n Times 2006….
En net daar, tussen mooi 1e jaar meisies, dronk landboustudente en die vrank reuk van alkohol boender ‘n verskriklike besef my tussen blaaie…

Ek is nou grootmens.

Ek kyk om my – baie van hierdie studente was op laerskool toe ek as eerstejaartjie in die mosh pit rondgespring het. Baie van hulle sal nooit – soos ek met my eerste Jool – die klanke van Sugardrive, Die Bushrock Band, Jack Hammer en Not my Dog ken nie. My hart klop vinniger…die plastiek bierglas raak sweterig in my hande…gedagtes flits deur my kop…:

…gaan ek ook nou blokkieshemde moet begin dra?
…gaan ek ook nou by Coquis Mansuitrusters begin klere koop?
…gaan ek ook nou Vrydag-aande inbly om Noot vir Noot te kyk?
…gaan ek ook nou Tings’ en Hatfield moet verruil vir News Cafe en Greenfields?
…gaan ek ook nou na Juanita du Plessis en Matthys Roets begin luister?
…gaan ek ook nou vir ‘n pensioenfonds betaal?
…gaan ek nou min-of-meer beskaafd moet wees…?

Ek dink nie ek is reg om Grootmens te wees nie…